Մայրանալու ճանապարհին...

Ծնվելուց մեկ օր առաջ երեխան հարցրեց Աստծուն.

- Ես չգիտեմ, թե ի՞նչ պետք է անեմ, երբ լույս աշխարհ գամ:

- Քո կողքին հրեշտակ կլինի, նա քեզ ամեն բան կսովորեցնի, կպատասխանի քո բոլոր հարցերին:

- Իսկ ի՞նչ է իմ հրեշտակի անունը:

- Կարևոր չէ, թե ինչ է նրա անունը... Դու նրան ՄԱՅՐԻԿ կանվանես:

Հղիության եվ մայրության ուղեցույց 

Հղիության 30-րդ շաբաթ

Քաշի ավելացման հետ մեկտեղ կնոջ շարժումները դառնում են ավելի դանդաղ: Քայլելիս կամ նստելիս չպետք է մոռանալ ճիշտ կեցվածքի մասին: Նախքան անկողնուց վեր կենալը անհրաժեշտ է թեքվել կողքի վրա: 

Պտուղը 30-րդ շաբաթում. 

քաշը` 1300-1400 գրամ է, 

երկարությունը` 37-38 սմ 

Երբեմն այս շրջանում կարող են լինել կծկանքներ, որոնք վնաս չեն պատճառում պտղին, քանի որ նա պաշտպանված է հարպտղային ջրերով: Պտուղը սկսում է մարզել թոքերը` ռիթմիկ բարձրացնելով կրծքավանդակը, որի ժամանակ երբեմն պտղաջրերը թափանցելով կոկորդ` զկռտոց են առաջացնում: 

Հղիության 31-րդ շաբաթ

Հղիության ուշ շրջանում մեջքի ցավերը անխուսափելի են: Ստորին վերջույթների երակների լայնացումը դառնում է ավելի հավանական: Հղիի քաշի 8-9 կգ-ով ավելանալը պայմանավորված է պտղի, ըկերքի, հարպտղաջրերի, արյան ընդհանուր, ինչպես նաև ճարպերի,  պրոտեինների և ջրի քանակի կուտակման մեծացմամբ: 

Պտուղը 31-րդ շաբաթում. 

քաշը` 1400-1500 գրամ է, 

երկարությունը` 38-39 սմ 

Եթե նորածինը ծնվել է այս շրջանում, ապա թոքային հյուսվածքի հասունության շնորհիվ նրա ապրելու շանսերը փոքր-ինչ մեծ են:

Մոտավորապես 500 մլ արյուն է անցնում արգանդի արյունատար  համակարգով, որը սերտ կապի մեջ է գտնվում պլացենտայի մազանոթային համակարգի հետ: Մոր արյունը երբեք չի խառնվում պտղի արյան հետ, չնայած որ նրանք բաժանված են նուրբ ընկերքային պատնեշով, որի միջոցով տեղի է ունենում նյութափոխանակությունը: Պտուղը կուլ է տալիս հարպտղային ջրեր:

Հղիության 32-րդ շաբաթ

Արգանդի հատակը շարունակում է բարձրանալ: Պտղի գլուխը հիմնականում ուղղված է դեպի ցած` կոնքամուտք, իսկ ոտքերը հպվում են մոր կողերին, որը կարող է դառնալ կրծքավանդակի շրջանում թեթևակի ցավերի պատճառ:

Անհրաժեշտ է շարունակել ընդունել վիտամիններով և հանքային նյութերով հարուստ սնունդ:

Պտուղը 32-րդ շաբաթում. 

քաշը` 1500-1600 գրամ է, 

երկարությունը` 40 սմ 

Հղիության վերջին շրջանում պտուղը լսում է, թե ինչ է կատարվում շրջապատում, ճանաչում է մոր սրտի բաբախումները, ծանոթ է գալարակծկանքների ձայներին և պորտալարով հասնող արյան աղմուկին, որոնց մեջ հատուկ առանձնացնում է մոր ձայնը և ծնվելով` անմիջապես ճանաչում և վստահում է նրան:

Հղիության 33-րդ շաբաթ

Արյան կարմիր գնդիկների քանակը սկսում է համապատասխանել շիճուկի քանակին: Պտուղն արդեն տիրապետում է բոլոր գործողություններին, որոնք հատուկ են նորածնին: Այս շրջանում նա շատ է քնում: 

Պտուղը 33-րդ շաբաթում. 

քաշը` 1800 գրամ է, 

երկարությունը` 40 սմ 

Ընտանիքը պետք է պատրաստ լինի նորածնի համար հագուստ, անկողին, խնամքի պարագաներ ձեռք բերելուն: 

Հղիության 34-րդ շաբաթ

Այս ժամկետում կարող է արգանդի վերին մասում կծկանքանման ցավի զգացում առաջանալ, որը խիստ կարճատև է և սովորաբար արագ անհետանում է, իսկ երբ դառնում է ուժեղ և կանոնավոր, անհրաժեշտ է դիմել բժշկի: 

Պտուղը 34-րդ շաբաթում. 

քաշը` 1800-2000 գրամ է, 

երկարությունը` 42-43 սմ 

Պտղի մազերը խտացել են, աղվամազը թափվել է: 

Մակերիկամների չափերը նույնն են, ինչքան մեծերինը, բայց ծնվելուց հետո փոքրանում են, իսկ մինչ այդ պտուղը շարունակում է վերցնել մոր օրգանիզմի կալցիումը` իր ոսկրային հյուսվածքի կառուցման համար:

Հղիության 35-րդ շաբաթ

Հղիի որովայնը այս շաբաթում սեղմում է կրծքավանդակին, որի պատճառով շնչառությունը և սննդի ընդունումը դժվարանում են: Անհրաժեշտ է սնունդը ընդունել քիչ քանակությամբ և հաճախակի, հանգստանալ, քայլել: 

Պտուղը 35-րդ շաբաթում. 

քաշը` 2100-2300 գրամ է, 

երկարությունը` 43-44 սմ 

Պտղի եղունգներն արդեն աճել են` հասնելով մինչև մատների ծայրերը: Հնարավոր է, որ ծննդյան օրը նա ունենա երկար եղունգներ, որոնցից դեմքի վրա քերծվածքներ լինեն: Այժմ արգանդի խոռոչը նեղ է նրա համար: Շարունակվում է ճարպային բջջանքի կուտակումը, հատկապես հարուսային գոտում, ուսերը դառնում են կլորիկ և փափուկ:

Հղիության 36-րդ շաբաթ

Արգանդի հատակը գրավում է առավելագույն բարձր դիրք և գտնվում է կրծոսկրի տակ: Շնչառությունը դժվարացած է,  պտուղը երբեմն հրում  է  ոտքով`  կարծես  ուղիղ սրտի տակ: 

Հղիության ընթացքում արտադրվող հորմոնները կարող են նպաստել մաշկի մազակալմանը, դիմագծերի կոպտացմանը, ոտնաթաթերի մեծացմանը:

Պտուղը 36-րդ շաբաթում. 

քաշը` 2400-2500 գրամ է, 

երկարությունը` 45 սմ 

Պտղի դեմքը կլորացել է, իսկ մաշկը` հարթվել: Ծծողական մկանները լավ մարզվում են: Պտղի ձայնը բավական փափուկ է, որը քիչ կբարձրանա ծննդաբերական ուղիներով անցնելիս: 

Հղիության 37-րդ շաբաթ

Հղիության 37-38 շաբաթներից սկսած, եթե առաջին հղիությունը չէ, սովորաբար ի հայտ են գալիս ծննդաբերության նախանշանները: Պտղի գլուխն իջնում է կոնքամուտք, արգանդի հատակը, և կինը որոշ թեթևություն է զգում: Ներքին օրգանների ճնշվածությունը թուլանում է, շնչելը և ուտելը` հեշտանում, սակայն արգանդն ավելի ուժեղ է սեղմում միզապարկին, և հղին միզարձակության կարիք ավելի հաճախ է ունենում: Պտուղը շարունակում է արագ աճել և 40 շաբաթական հասակում նրա տոտիկները հպվում են մոր կրծոսկրին:

Պտուղը 37-րդ շաբաթում. 

քաշը` 2600-2700 գրամ է, 

երկարությունը` 46-47 սմ 

Պտուղը պատրաստ է ծնվելու, սակայն ճարպի կուտակումը շարունակվում է, իսկ որոշ նեյրոնների միելինային շերտը նոր է սկսում առաջանալ այն շարունակվում է նաև ծնվելուց հետո: Կրկնածինների, ինչպես նաև զույգ պտղի դեպքում ծննդաբերական ցավերը կարող են ավելի շուտ սկսվել: 

Հղիության 38-րդ շաբաթ

Մինչև իսկական ծննդաբերական կծկանքները, հղին հնարավոր է, որ ունենա կեղծ կծկանքներ, որոնք կարող են լինել նույնքան ցավոտ, ինչքան իսկականները: Դրանք վերանում են, երբ հղին սկսում է շարժվել: Անհրաժեշտ է խորհրդակցել բժշկի հետ:

Պտուղը 38-րդ շաբաթում. 

քաշը` 2800-3000 գրամ է, 

երկարությունը` 47-48 սմ 

Հղիության վերջին շաբաթների ընթացքում պտղի աղիքներում կուտակվում են կենսագործունեության արգասիքներ: Այդ սևականաչավուն նյութը կոչվում է մեկոնիում (առաջնային կղանք) և բաղկացած է արյան քայքայված, աղիքային մահացած բջիջներից, մաշկի թեփուկներից, սաղմնային աղվամազից, որոնք պտուղը կուլ է տվել պտղաջրերի հետ և այլն: Նորածինն այն դուրս կբերի ծնվելուց հետո: Մեկոնիումը կարող է անջատվել մինչև ծննդաբերությունը, եթե երեխայի մոտ կա հիպոքսիա (թթվածնաքաղց): Այդ դեպքում պտղաջրերը դառնում են կեղտոտ, կանաչավուն, և պտուղը ծնվում է կանաչավուն լորձով պատված: 

Հղիության 39-րդ շաբաթ

Հղիության վերջին շաբաթներին օրգանիզմում, հատկապես նեյրոհումորալ համակարգում կատարվում են նշանակալի փոփոխություններ: Մեծանում է էստրոգենային հորմոնների, որոշ միկրոտարրերի (C`, Mn, Co), կենսածին ակտիվ նյութերի խտությունը, որոնք նպաստում են արգանդի կծկողականության և զգացողության բարձրացմանը: Օրգանիզմը նախապատրաստվում է ծննդաբերությանը:

Պտուղը 39-րդ շաբաթում. 

քաշը` 3000-3200 գրամ է, 

երկարությունը` 48-49 սմ 

Արդեն վերացել է պտղի աղվամազի մեծ մասը, բացառությամբ որոշ մասերի: Ոտքերի եղունգները լավ աճել են: Մոր հակամարմինների մի մասը կարող է անցնել ընկերքային պատնեշով և թափանցելով երեխայի արյան մեջ` պաշտպանել նրան վարակներից:

Հղիության 40-րդ շաբաթ

Արգանդի հատակը գտնվում է այնպիսի բարձրության վրա, ինչպես մեկ ամիս առաջ էր` թրաձև ելունի և պորտի միջև. ցայլքից 30-32 սմ բարձր: Հղին իրեն ավելի թեթև է զգում, առկա են կծկանքանման թույլ ցավեր, այսինքն` օրգանիզմը պատրաստվում է ծննդաբերությանը: 

Պտուղը 40-րդ շաբաթում.

Սովորաբար հասուն նորածնի հասակը 48-55 սմ է, միջին քաշը` 3500 գր, չնայած հնարավոր են տատանումներ: Ծննդաբերական ուղիներով անցնելիս պտղի գլխի ձևը կարող է փոխվել, որը 1-2 օրվա ընթացքում շտկվում է: Երեխայի մաշկը հաճախ լինում է կապտավուն, գորշ և նույնիսկ դեղնավուն, ծածկված առաջնային քսուքով, արյունով, աղվամազերի մնացորդներով, մեկոնիումով:

Հղիության 41-րդ շաբաթ

Եթե հղիության 40-րդ շաբաթից հետո ծննդաբերությունը 1-2 շաբաթ ուշանում է, անհրաժեշտ է դիմել բժշկի, որը կնշանակի բոլոր անհրաժեշտ հետազոտությունները, որոնք թույլ կտան գնահատել երեխայի սրտի զարկերը, որոշել պտղաջրերի քանակը, պլացենտայի վիճակը և այլն: 

Ծնվելիս հասուն պտուղը լավ պատրաստված է արտարգանդային կյանքի փոփոխություններին: Թոքերն ի վիճակի են լիովին ապահովելու նրան թթվածնով: Իհարկե, ամենամեծ փոփոխությունները տեղի են ունենում սրտում: Սրտի միջնապատերում գոյություն ունեցող անցքը, որն անջատում է թոքերն արյան շրջանառությունից, ծնվելուց հետո միանգամից փակվում է, և արյունը սկսում է շրջանառել թոքերով: Նորածնի բնածին ռեֆլեքսները (ծծելու, որոնման, հափշտակման, պաշտպանման) ապահովվում են մոր և մանկան միջև շփումը: 

Հղիության 42-րդ շաբաթ

Հղիների 90%-ը ծննդաբերում է մինչև 42-րդ շաբաթը: Եթե հղիությունը գերազանցում է 41 շաբաթը, պետք է անհապաղ  դիմել բժշկի` ծննդալուծման հարցը որոշելու համար:

Հարցեր, պատասխաններ, մեկնաբանություններ